الثلاثاء، 3 مارس 2009

نااااااااااااااااااااااااس

ناس تسعى من اجل دعوه
وناس بتسعى من اجل شهوه
ناس بتسعي عشان الاصلاح
وناس ما بتحبش حد يرتاح
ناس بتسعي لفعل الخير
وناس بتسعي لضر الغير
ناس مش عايزه اي فقير تعبان
وناس بتحب تستقوي علي الغلبان
ناس بتسعي وتموت من اجل الحق
وناس عمرها للباطل ما تقول لا
ناس بتسعي بجد ليوم الحساب
وناس ناسيه وبتسعي للخراب
ناس بتسعي من اجل شهاده
وناس بتسعي عشان تعصي زياده
ناس بتسعي من اجل غزه
وناس بتسعي من اجل لذه
ناس كل همها نهضه امتنا
وناس بتسعي عشان ذلة عزتنا
ناس ماشيه مسلمه امرها للرحمن
وناس بتقول انا تبع فلان وفلان
ناس بتتمني نعيم الجنه
وناس بالحرام عايزه تتهني
ناس بتقول هنمشي وراك يانبينا
وناس بتقول يا شيطان علي فين هتودينا
ناس حلمهم يقابلوا رسولنا الامين
وناس حلمهم ياقبلوا تامر وشرين
ناس عمهرهم ما كانوا في الدنيا طمعانين
وناس نفسهم يبقوا فيها مخلدين
ناس بتحب بعضها بجد وباخلاص
وناس مابتحبش غير نفسها وخلاص
ناس لما بتعصي تعمل بحر بدموع العين
وناس لما بتعصي ولا فارقه معاهم ولا حاسين
من الاخر كدا
اختار انت عايز تكون مع مين ؟؟
مع الناس اللي في الشمال ولا اللي علي اليمين
الناس اللي في الشمال بالدنيا مخدوعين
والناس اللي في اليمين هتلاقيهم متراقبين
والناس في الشمال بالدنيا مبسوطين
والناس في اليمين غير رضا ربنا مش عايزين
الناس في الشمال عن حالهم برده مش راضين
والناس في اليمين ساجدين شاكرين حامدين
اصل السعاده مش في طريق اخره عذاب اليم
لكن السعاده في طريق نهايته جنه ونعيم
والفايز مش اللي يكسب دنيا اكيد هتزول
لكن الفايز اللي في الاخره يبقي مع الرسول

هناك 49 تعليقًا:

ايوشة يقول...

تسلم ايديكى الكلمات جميلة اوى ربنا يجعلنا دايما من اهل اليمين االعابدين له

نبض الحياة يقول...

تسلم يمناكى
ربنا يجعلنا دايما كما يحب ويرضى .
بارك الله فيكى
تحياتى

القلم السكندري يقول...

إن الله لا يجمعُ لعبدٍ امنين

ولا يجمعُ علي عبدٍ خوفين



سلمت يمينك

اسماء واحلام فى وجدانى يقول...

ايه الناس دى كلها

لقد اصاب قلمك البشر كلها فى جرة واحدة منه

اللهم اجعلنا من اهل الجنة

امين يا رب العالمين

سجود يقول...

جزاكي الله خير ايوشه
ونبض الحياه اشكركم
واللهم اميييين

سجود يقول...

جزاكم الله خير القلم السكندري
واسماء واحلام في وجداني علي المرور والمشاركه

نحو الهدف يقول...
أزال المؤلف هذا التعليق.
sheta يقول...

ماشاء الله على هذا الشعر اخت سجود بجد رائع ومعبر عن حال امتنا تماما ونسألك مزيد من الابداع الذى تعودنا عليه منكى وان تكون كل مواضيعك هادفه كى تستفيد منه الامه الاسلاميه وفقك الله حيث كنتى وحيث تكونى ااااااامين يارب العالمين اخيكىsheta

ِِAdem El-Mahdy يقول...

السلام عليكم و رحمة الله و بركاته

بجد كلمات رائعة

استأذن حضرتك اخدها فى أرشيفى

وبس

سجود يقول...

جزاك الله خير اخي شيتا

سجود يقول...

اه اتفضل اخي اديم المهدي

حياتى نغم يقول...

السلام عليكم / ما شاء الله عليكى أختى سجود ، بارك الله فيكى ، أشكرلك مرورك الجميل .

غير معرف يقول...

أختي سجود : أشكرك علي الأبداعات المتواصله في المدونه
غاليتي ..

حبنا في الله ..

كنز من الوفاء ..
تصحبها آمالنا
و تجمعها محبتنا
نتنفسها هواء
كنز من نسمات الوفاء
ها هي صداقتنا
فليتها تدوم
و تسمو بها الابتسامة
و الوفاء
و يكون ذلك سر محبتنا
اخوكي بليغ الفضلي

سجود يقول...

جزاكي الله خير اختي حياتي نغم
وجزاك الله اخي بليغ الفضلي

دينا حامد يقول...

شكرا ليكي على تعليقك في مدونتي

موضوعك جميل والناس بتختلف في كل حاجة كل واحد بيجري ورا اللي شايفه في مصلحته

تحياتي

سجود يقول...

جزاكي الله خير اختي دينا حامد علي مرورك ومشاركتك

عليااا يقول...

بجد و باخلاص موضوع جميل صنف الناس كلها ممكن اقول من عندى تصنيف الشعب المصرى ناس دماغهاااا فى الكوره وناااس المهم فى حياتهاااا الافلام والموديل ونااااس عايشه حياتهاااا مش تعبان فى الفلوس وناااس بتحب تعيش فى هدوء من غير ازعاج ونااس نفسهاا تعيش باخلاص لربنا بس الحكام مش راضيه بكداااااا

عاشقة الشهاده. يقول...

جزاكم الله خير اختى سجود على هذا الموضوع
وبجد حلو كتيييييييير اوى وفعلا الناس هما نوعين
وانتى صنفتيهم بالموضع ده
حقا تدوينه رائعه نشكرك عليها
ونتمنى المزيد من ذلك النوع
اختكم
عاشقة الشهاده

سجود يقول...

جزاكم الله خير اختي عليا واختي عاشقة الشهاده وفعلا عليا الناس انواع كتيره بس ده مايمنعش ان في ناس حلوه

اعشق فى الليل ضوء القمر يقول...

سجود
السلام عليكم ورحمه الله وبركاته
دعوتك جميله جدا
أنا مش هقول غير
أسأل الله العظيم رب العرش الكريم أن يجمعنى و إياك يوم لقيامه فى ظل عرشه يوم لا ظل إلا ظله

الايــــــــــام يقول...

عزيزتي سجود

بوست رائع جدا ومدونتك اروع

طاب لي المكوث في واحتك النقية
كوني كما يرضى الله عز وجل
وواصلي روعتك دوما


وكل الشكر والامتنان على تشريفك مدونتي واتمنى دوام التواصل

ودي وتحياتي

سجود يقول...

اللهم ادخلنا الجنه وقنا من النار وحرها
جزاك الله خير اعشق في الليل ضوء القمر علي مرورك ومشاركتك

سجود يقول...

جزاك الله خير الايام علي مشاركتك في مدونتي

النجم القادم يقول...

الله ينور حقا جميل جدا جدا جدا ربنا يوفقك يارب

Soul.o0o.Whisper يقول...

سجود


باشكرك بجد على زيارتك للمدونة

و ربنا يبارك لك يارب
و يبارك فى قلمك


اتمنى أشوفك دايما :)


خالص الود

سجود يقول...

جزاكم الله خير علي تشريفكم للمدونه (النجم القادم _soul.o0o.whisper)

د.توكل مسعود يقول...

السلام عليكم ورحمة الله.. وبعد

أسأل الله أن يجعل حياتنا كلها سجود.... لوجهه الكريم

بوركت ونفع الله بك.

اسمح لى أن أنبه الزوار الكرام أصحاب التعليقات الذين يكتبون..انتى وجزاكى و دمتى عندما يخاطبون المؤنث أنها تكتب فى اللغة العربية أنت و جزاك ودمت... الفرق أن المذكر ينتهى مفتوحا وأن المؤنث ينتهى مكسورا.

فقط من باب الغيرة على اللغة العربية

"واللى مابيغيرش يبقى مابيحبش"

تقبلى تحياتى والسلام.

سجود يقول...

جزاكم الله خير وانا قسم لغه عربيه ولكن احنا بنتكلم علي النت باللغه العاديه
لكن علي العموم شكرا علي دخولك ومشاركتك د. توكل مسعود

غير معرف يقول...

السلام عليكم
اختى :سجود

ناااااااااس فعلا وهما نااااااس
قسم الناس لنوعين وهما ما ذكرتيهم
تدوينه رائعه
سلمت يداكى
ونتمنى المزيد من تلك الابداعات


تحياتى:بنت الامام

zainab يقول...

عزيزتى سجود

ماشاء الله عليك و على قلمك المبدع اللى صور لنا كثير من البشر

يارب اللهم اجعلنا من أهل اليمين

تحياتى

سجود يقول...

جزاكم الله خير اختى بنت الامام
على مرورك ومشاركتك

سجود يقول...

جزاكم الله خير اختى زينب على المرور
ونتمنى التواصل معنا
والدعاء لنا بالتوفيق

نور الاسلام يقول...

السلام عليكم

ماشاء الله كلمات رائعه ومعبره جدا ..بارك الله فيك اختى سجود .

وأسأل الله أن ينفع بك الإسلام والمسلمين..

إشراقة أون لاين يقول...

جزاك الله أختى سجود أوجزت فأعجزت بصراحة كلامك غير فى حاجات كتير

سجود يقول...

جزاك الله خيرا نور الاسلام علي مشاركتك وتعلقيك

سجود يقول...

جزاكم الله خير اشراقه اون لاين علي التعليق

اللؤلؤة يقول...

السلام عليكم
الأخت سجود
كلمات رائعة وإحساس على
اللهم إجعلنا من أهل اليمين التائبين الابدين المستغفرين .
وجزاك الله خيرا

سجود يقول...

جزاكم الله خير اختي اللؤلؤه علي مشاركتك

صوت من مصر يقول...

انا مين فيهم
شكرا جدا

سجود يقول...

جزاكم الله خير صوت من مصر على المرور والمشاركه
وان شاء الله تكون من النوع الاحسن اللى فى النوعين

لجين أبو الدهب يقول...

ربنا يجعلنا من أهل اليمين ..

وممن يمشون على صراطه المستقيم ..

مدونتك جميلة والقصيدة بالرغم انها عامية لكن معبرة ..

اول مرور ليا ومش الاخير ان شاء الله ..

دمتِ بخير حبيبتى سجود ..

سجود يقول...

جزاكم الله خير اختى لجين على المرور

مـجـنـووون يقول...

هي الدنيا كده

فيها ناس عايزه الخير والحب

وفيها ناس عايزة الكره والفساد

وعلي فكرة هي سنة الحياة كده وسنة الله في الأرض

لزم يكون فيه شر علشان نحس بطعم الخير

ربنا يستر
علينا ويجعلنا من أصحاب النفوس الظاهرة

تقبلي مروري
مجنووون

سجود يقول...

فعلا كلامك مظبوط لازم يكون في ناس مش حلوه وناس مؤذيه عشان الناس الكويسه تتجنب الحاجات اللي هما بيعملوها حتي الرسول عليه افضل الصلاه والسلام نفسه كان له جار يؤذيه وفي ذلك حكمه اننا نتحمل من يؤذينا واننا مش هنبقي احسن من الرسول
وجزاكم الله خير مجنون علي المرور

arsenalwy يقول...

سجود

انتى رائعة من اكتر البوستان اللى قريتها فى حياتى روعةوجمال ومست حاجات كتير جوايا

اسمك رائع او لا اعلم ان كان اسم ظهورك بالمدونة

بوست عبقرى من انسانة محبة لدينها ولربها

سجود يقول...

جزاكم الله خير ارسنلي علي المرور

هذه حياتي يقول...

السلام عليكم ورحمة الله وبركاته

أختي سجود

ربنا يجعل ما تكتبين في ميزان الحسنات ويجعله خالصا لرب البريات
وتذكري أختي مقولة الرسول الكريم "كل الناس يغدو فبائع نفسه فمعتقها أو موبقها"

خالص شكري وتقديري وصادق دعائي

سجود يقول...

جزاكم الله خير هذه حياتي علي المشاركة

غير معرف يقول...

ربنا يبارك فى حضرتك اختى سجود ويكرمك على نشر الشعر ده
ولكن مع حضرتك احمد سعيد كاتب هذا الشعر كنت ارجو من حضرتك انك تنقلى معاه حق التأليف ولكن جزاكى الله خيرا على نشره