الخميس، 19 مارس 2009

امتحان ولازم تشارك فيه

اولا:السلام عليكم ورحمة الله وبركاته
ثانيا : عايزينك حبه معانا
تجاوب علي بعض الاسئله عشان نعرف راي المدونون فيها
يعني حبه اسئله في السياسه
واللي ليه في السياسه يشاركنا
واللي مالهوش
خلاص بقي مش هنتعبه معانا بس
برده يشاركنا

يلا نبدا بقي الاسئله مستعد؟؟!

شكلك ليسا مش مستعد يلا استعد

مش عايزين اجابه طويله وتخلص القلم والكراسه احنا عايزين اوافق ام لا اوافق وممكن تكتب تعليق بسيط بجوارها

1:ما رايك في نظام التوريث؟
2:ما رايك في النظام الحاكم؟
3:ما رايك في رفع الاسعار لتسديد ديون الدوله؟
4:ما رايك في قيام احزاب سياسيه تحت شعار ديني؟
5:مارايك في قيام الانشطه السياسيه بالجامعات؟
6:ما رايك في قانون الطوارئ؟
7:ما رايك في تزوير الانتخابات لصالح الحكومه؟
8:ما رايك في نظام جماعه الاخوان المسلمين؟
9:ما رايك في نظام رابطه مدونون من اجل فلسطين هل تحقق شيئا مفيدا؟
والسؤال الاخير
.
.
.
والاهم
.
.
.
10:ما رايك في الاستفتاء؟؟؟؟؟؟؟

هناك 50 تعليقًا:

صوت من مصر يقول...

بحجز الاول

سجود يقول...

ههههههههههه
ماشي احجزه بس المهم الرد ع الاسئله

صوت من مصر يقول...

1+++ نظام التوريث حاسس انى كلامى الارسال هيعمل ساعتها تيتتتتتتتتتتت صح الكلمه ولت اكيد
2+++++++ النظام الحاكم عصابه وواضحه جدا
3++++ لا احنا ناخد من كل مواطن بيته وعفشه افضل
طب ليه واحد زى الرئيس واولاده من اغنى اغنياء العالم ميتبرعوش ب 100 الف جنيه بس من الى سرقوهم
4+++++ الاحزاب تتجه اتجاه خاظئ جدا لانها بتستتر وراء شعار دينى وليس مبادىء محدده تنتجه عقليات لها وضوح من الاخر مش حابب النظام ده اصلا
5++++ قيام الانشطه السيايه بالجامعات جميل جدا لاننا هنفهم معنى كلمه وطن لان الشباب هما الى هيعبوا بصدق دون خدع
6+++++ قانون لا مؤخده
7++++ مواخدين على كده من توت عنخ امون ياعنى هو حسنى الى بيزور لا دى الحكومه ( a7a)
8++++ للاسف انها تحتمى فى دين الله وللاسف اكتر جبناء وقت الجد
9+++++++++ باذن الله تقدر
10++++++++++
استفتاء هايل واسف على الفاظى بس دى الى الحكومه تستحقه مننا

صوت من مصر يقول...

متاج ردك ضرورى على اجباتى

سجود يقول...

جزاك الله خيرا على رايك

"النجم القادم" يقول...

1-نظام التوريث لا اعتقد ان مصر مهبئة الان لكى يتم
2-النظام الحاكم خلاص كده كفاية عليه قد قرب على نهايته وتخبطه دليل على ذلك
3-الاسعار لم ترفع لتسديد ديون الدولة وانا رفعت لكى تعوضهم على خسارتهم فى الازنة العالمية فكرتينى الدكتور حشمت بيقولى مرة طب احنا ذنبنا ايه سرقوا فلوسنا وضاعت منهم فى الازمة العالمية ذنبنا ايه جايين يسرقوا مننا تانى علشان يعوضوا خسارتهم فهو ده سبب رفع الاسعار
4-قيام احزاب ذات مرجعية دينية هو توضيح دور الدين فى السياسة والحياة وتنظيمها للعملية السياسية وهذا سيحقق نجاحا بالغا وهذا مايخشاه النظام مما دفعه الى حظر تاسيس اى حزب سياسي ذو مرجعية دينية
5-الجامعة هى مجتمع مصغر للكجتمع الكبير بمعنى انك فى الجامعة تقابل الاستاذة والعاملين والطلاب والامن ولكلا منهم اتجاهه وتتعامل معه وتعرف معنى التعامل والقيادة ونحن اذا نظرنا الى قيادات هذا المجمتمع نجد انهم كانوا قيادات داخل الجامعة امثال الدكتور عبدالمنعم ابوالفتوح امين اتحاد الطلاب بجامعات مصر فى عهد السادات وهو الان امين اتحاد الاطباء العرب واحد قيادات مكتب الارشاد للاخوان المسلمين كذلك الدكتور عصام العريان ايضا حبيبي الدكتور جمال حشمت كان احد قيادات الجامعة والان احد قيادات الاخوان والعمل العام وايضا حسام بدراوى احد قيادات الحزب الواطى وهو ايضا كان قياديا داخل الجامعة وايضا الوزير السابق على الدين هلال كان احد قيادات الجامعةواصبح بعدها وزير واحد قيادات لجنة السياسات فالجامعة نواة للعمل المستقبلى ومن خلالها تصبح قادرا على ممارسة العمل العام والسياسي بحرية
6-قانون الطوارئ هو قانون فصل خصيصا لملاحقة اللى مش على مزاج النظان والحكومة
7-تزوير الانتخابات هو تزوير ارادة امة فى الاصلاح والتغير الى الافضل وان كان الحزب الحاكم يضمن الشعبية لجعلها انتخابات نزيهة ولكن نزيهة ماتت مع اللى ماتوا فى الانتخابات وانتهز الفرصة وادعوكم لمشاهدة موقع سجل المزورين فكرة اكثر من رائعة
8-نظام جماعة الاخوان هنا اسمحوا لى ان اتحدث عن شقين اولا الشق التنظيمى هم افضل الجماعات الموجوده فى العالم تنظيميا وذلك من اهم الاسباب التى تجعل اى احد يقف امامها مكسورا غير قادرا على اختراقها وذلك لانها منظمة تنظيما صحيها وهذا من اسباب استمرارها رغم كل محاولات الاختراق
ثانيا اتحدث عن الاخوان كجامعة وفكرة بجد اقسم بالله العلى العظيم انى لم اجد فكرة افضل من هذه الفكرة فهى شاملة شامخة تدعوا الى تعلم الاسلام الحنيف والعمل على الاصلاح فحياك الله امامنا الشهيد وحى الله من سار على دربك ولكى الله دعوتنا
ثالثا اخوانى الكرام احب ان اقول شيئا ان حدث خطا من احد الاخوان فهذا عيبا فى هذا الشخص ولكن ليس عيبا فى دعوة الاخوان فرجاء عدم التعميم فنحن من يجد فلان اخوانيا وقد فعل ذلك يبقي الاخوان كلهم كذلك لا والله انها اسمى دعوة وانا اقول ذلك عن تجربة وان كنت اخطا فالخطا من الشيطان وادعو الله ان يثبتنى فى مواجهته
9-رابطة مدونون من اجل فلسطين والله والله والله ما انشاناها الا ونحن نهدف انها لله عزوجل وانها تكون نواة لنشر القضية الفلسطينية ونحن نوجه الدعوة للجميع للانضمام الينا والعمل معنا فنحن فى الحاجة الى اى يد تمد الينا لكى تدافع عن القضية الفلسطينية ونتمنى الاستمرار والنجاح وتحقيق ما قد قمنا من اجله واعلمكم اخوانى اننا ما قمناالا من اجل ان ننجح وان نحقق ما قمنا من اجله
10- جزاكى الله خيرا اختنا على هذا الاستفتاء ربنا يبارك فيكى ياااااااااااااااااااااااااااااارب

غير معرف يقول...

جزانا واياكم النجم القادم
وجزاكم الله خير علي مشاركتك

اصحى يا نايم يقول...

أسئلة مشروعة واجاباتها منطقية جداً .... هانقول ايه يعنى

غير معرف يقول...

جزاك الله خير بس برده عايزين رد علي الاسئله

غير معرف يقول...

جزاك الله خيرا والرد محتاج كتابة كتيره اووووى بصراحة بس كفاية حسبنا الله ونعم الوكيل ودى مدونتى
http://moslemon-1.blogspot.com/

غير معرف يقول...

جزاكم الله خير حمساويه وانا حابه اعرف رايك

عبد من عباد الله يقول...

السلام عليكم يا استاذه سجود اولاً انا اول مره ادخل مدونتك و دا شرف ليا ....

و علشان ما اطولش عليكي ندخل في موضوع الاستفتاء ده علطول .. بس قبل ما ابدأ اعتقد ان كلامي مش حيجي على هواكي اوي ، ممكن تعتبريها اختلاف في وجهات النظر .. نبدأ :

1 / احدى نظم الحكم ربما يكون صالح لدوله و غير صالح لدوله اخرى و غالباً دا بيتحدد على حسب ما يرتضيه الشعب .

2 / صوره من الشعب و مرآه له .. ولا يحكم احداً على ارض الله إلى بأمر الله .

3 / احد الحلول الاقتصاديه ممكن تتطبق غلط او في وقت مش مناسب و ممكن تستخدم بطريقه صحيحه في وقت صحيح لمده معينه و بعدين حسب ما درست ( و يمكن اكون مش فاهم ) ان ارتفاع الاسعار دا ارتباطه الاساسي مش بالحكومه لاننا في اقتصاد قريب جداً لاقتصاد السوق .

4 / لو قامت تحت شعار ديني يبقى ما ينفعش تتكلم عن مصر لاني صعب شويه اني اصدقها لأن ببساطه مصر مكونه من مسلمين و مسيحين و العنصرين شاكروا في حرب اكتوبر دفاعاً عن مصر .

5 / مش عارف ليه مش متقبل فكره دخول السياسه إلى محراب العلم .. يعني ممكن يكون عايزين شويه تركيز في العلم و نسيب موضوع السياسه للناس الفاضيه شويه عايزين نهتم شويه بالعلم .. و كمان يعني الطلبه مش مقطعه العلم في الجامعات علشان نزودهم كمان بالسياسه .

6 / انا بسمع عنه بس معرفهوش كويس .. لكن عرفت انه موجود في كل دول العالم و الله اعلم و قيل لي انه لابد منه فعلاً في حالات الطورائ لان في حاله زي حاله الحرب و فيه حصل مشكله معينه في الدوله او تصرف خارج من بعض الاشخاص ممكن يضر الدوله و يضعفها في الوقت دا فلازم يستخدم قانون العسكري دا لتسويه الامور و اصدار احكام سريعه علشان الحاله لا تسمع بالمحاكمات الطويله المدنيه ... اما عن مين بقى يحدد يا ترى الحاله دي حاله طوارئ فعلاً ولا لأ دي بقى حاجه تانيه .

7 / هههههههههه و الله رأيي في تزوير الانتخابات لصالح الحكومه هو بظبط رأيي في تزوير الانتخابات في صالح المعارضه !!! التزوير اعتقد انه -شئ بديهي- غلط اياً كان لصالح مين .

8 / في الحقيقه انا مش مطلع جيد على نظام جماعه الاخوان المسلمين و معرفش كويس طريقه فكرهم .. بس الاسم فقط يشعرني بقلق لنفس الاعتبارات اللي قولتها في السؤال الرابع لكن في الحقيقه مقدرش احكم عليهم كويس .

9 / برده للأسف انا جاهل بالرابطه دي و معرفهاش كويس .. بس اعتقد ان الموضوع شويه اكبر من رابطه مدونين ؟! او يمكن من وجهة نظري البسيطه اننا لو حنعمل رابطه يبقى الاولى تبقى رابطه مدونون من اجل مصر !!

10 / كويس .. بس واضح ان صاحب الاستفتاء حاطط الاسئله بطريقه تجبر إلى حد ما الشخص اللي بيجاوب انه يتجه لاجابه معينه .. او بمعنى تاني ان صاحب الاستفتاء حاطط الاسئله وهو عارف اجابتها حتبقى ازاي و واثق إلى حد كبير حتكون ايه الاجابات .. بمعنى ادق الاستفتاء مش علشان يعرف حاجه معينه هو فعلاً محتار فيها او عايز يعرفها .
***************************

انا عارف اني طولت بس حاولت اقتصر على قد ما اقدر زي ما طلبتي و كمان ما كنت لازم اشرح شويه بسيطه علشان تبقى واضحه و لكني لم استفض في الشرح .. و في الاخر اتمنى ان ظني يخيب و كلامي يجي على هواكي او متوافق مع وجهة نظرك يعني .... شكراً ليكي و الله المستعان .

د/عرفه يقول...

سلام عليكم
انا جاوبت عن الاستفتاء
بس فى سرى
مش هعرف اتكلم كتير اوى كده
اظن ان اجاباتى معروفه من كتاباتى
تقبلِ تحياتى

غير معرف يقول...

جزاك الله خير عبد من عباد الله علي المرور والمشاركه
بس حبيت اقول ان الاستفتاء فيه حريه كامله وانا بس حبيت اعرف اراء المدونين في الاسئله اللي مطروحه لاي فرد ليه شويه في السياسه
لكن مش عايزه حد يتجه اتجاه معين ناحيه الاسئله ولا حاجه
بس برده جزاكم الله خير والكلام عادي وفيه متوافق مع وجهه نظري وفي حاجات تانيه لا بس علي العموم اختلاف الاراء لا يفسد للود قضيه
ونشكرك علي المشاركه

غير معرف يقول...

د/ عرفه جزاكم الله خير
بس انا كنت حابه اعرف اراء حضرتك ومش لازم تكتب كتير انا كنت عايزه بس اوافق القانون ده ولا لا اوفق وممكن تعليق صغير بس ده اختياري
علي العموم خير وجزاكم الله خير

لجين أبو الدهب يقول...

1- لا أوافق ..

2- لا أوافق ..

3- لا أوافق ..

4- لا أوافق ..

5- أوافق ..

6- لا أوافق ..

7 - لا أوافق ..

8 -أوافق ..

9- لا أعلم عنها شئ ..

10 - رأى إنه هايوودينى فى داهية D:

جزاكِ الله خير حبيبتى سجود على الاستفتاء ..

دمتِ بخير ..

غير معرف يقول...

ههههههههههه
جزاكم الله خير
وخليك جرئيه وعبري عن رايك بحريه
اشكرك جداا لجين

Unknown يقول...

1- لا أوافق
2- لا اوافق
3- لا اوافق
4- أوافق
5- أوافق
6- لا أوافق
7- لا أوافق
8- مش عارف
9 -أوافق .. ولو تذكير بالقضية التي لا يمكن أن تنسى

عجبك كده حتودينا في داهية .... ههههههههههههه

حياتى نغم يقول...

السلام عليكم / شكراً سجود على الاستفتاء
ج1 لا أوافق .
ج2 لا أوافق .
ج3 لا أوافق .
ج4 بالطبع أوافق فالدين هو الحياة قال تعالى { قل إن صلاتى ونسكى ومحياى ومماتى لله رب العالمين }
ج5 أوافق فكيف إذن تنمو روح الحرية والإيجابية والمقاومة وسعة الفكر لدى الشباب .
ج6 لا أوافق .
ج7 لا أوافق وأين إذن الحرية والديمقراطية .
ج8 أوافق فهى الأقوى والأفضل هى الأيسر ووسطية الدين والأقرب للهدى النبوى ، بالطبع بعيداً عن الأفراد وإنما عموماً فالحكم على المبادىء والنظام والأسس .
ج9 أوافق وبإذن الله تحقق ولكن بالصبر والعمل والتعاون .
ج10 يعنى موافقه مع إنى كنت ودعت الامتحانات من سنين :)
دمتى بخير سجود .

غير معرف يقول...

جزاكم الله خير معتز شاهين
وخليك جرئ وما تخافش انا اكيد مدونتي متراقبه ومتراقب مين بيدخلها بس ديتها ايه 30 سنه سجن مش مشكله كله عشان الامتحان تعدي منه
هههههههههه
لا لا مش متراقبه ولا حاجه
وجزاكم الله خير علي المشاركه

غير معرف يقول...

حياتي نغم اشكرك جدا واجابتك جميله
وحريه الراي متوفره لدي مدونه قل يا قلم
واحنا حبينا نذكرك شويه بالامتحانات عشان نتساوي كلنا

رحلتنا في الحياة يقول...

1:ما رايك في نظام التوريث؟


بيفكرنى بفيلم الارض لما يجوا يخرجوا من ارضه ويسرقوا ارضه وهوا يفضل لاخر نفس متمسك بيها
التوريث كده تمليك واحد لا يستحق على ملك ليس ملكه لا هوا ولا ايوه :(



2:ما رايك في النظام الحاكم؟
بصراااااااااحة زبااااااااالة الانظمة العربية والعالمية كل الانظمة فى الوطن العربى زفت بس انا شايفة ان مصر هى الوحيدة اللى تقدر تواحد العرب كلهم يبئا تستحق نظام يحكم بشرع الله ويتطبق شريعته



3:ما رايك في رفع الاسعار لتسديد ديون الدوله؟

كلاااااام فارغ وضحك على الدون كل يوم يرفعوا والناس بتتدبح وكله فى جيوب النصابين اللى ماسكين البلد هى علشان بلدى تتقدم اموت انا وعيالى من الجوع وياريت هتتقدم ولا تتسدد ديونها


4:ما رايك في قيام احزاب سياسيه تحت شعار ديني؟
مش بحبها بصراحة لان الدين لا ينفصل عن اى شئ تانى انما اعمل احزاب بشعار دينى مش هينفع عايز تعمل حزب لكن يكون ليه مبادئ ليه اعمله شعار دينى معين احنا فى بلد فيها ديانات مختلفة



5:مارايك في قيام الانشطه السياسيه بالجامعات؟
هى فين دى مش مسموح بالكلام ده فى الجامعات وعلى ايامى كان بيبهدلوا الطلبة اللى ليها نشاط سياسى



6:ما رايك في قانون الطوارئ؟
انتهاك لحقوق الانسان بكل الصور



7:ما رايك في تزوير الانتخابات لصالح الحكومه؟
شئ طبيعى لحكومة فاسدة مش بتراعى ربها هتراعى الناس ونزاهة الانتخابات



8:ما رايك في نظام جماعه الاخوان المسلمين؟
محتاجين شوية ذكاء اجتماعى علشان يقدروا يحققوا اهدافهم بس كمان زى ما فيه بعض الاشياء بتعجبنى فيهم فى سلبيات مش بحبها فيهم
وعلى العموم انا برفض دايما فكرة الانتماء لحزب او اتجاه سياسى وا دينى معين



9:ما رايك في نظام رابطه مدونون من اجل فلسطين هل تحقق شيئا مفيدا؟
والله اول مرة ادخلها بس ان شاء الله مش الاخيرة بس انا شايفه انها فكرة كويسة على الاقل تحرك القضية بدل ما تروح فى عالم النسيان كالعادة


والسؤال الاخير
راى فى الاستفتاء والله حلو اكيد مش هنقدر نجامل فيه بس انا شايفة انه مش حيادى بيودينا لاتجاه محدد بيبين مسلؤى النظام الحكام وفى نفس الوقت بيحاول يعرف راى الناس عن الاخوان

رحلتنا في الحياة يقول...

صحيح لو المدونة متراقبة انا مش معاكم :)

غير معرف يقول...

ههههههههههه
جزاكم الله خير وماتخافيش ايوشه الدنيا بخير ليسا
بس انا لي تعليق بجد علي ان الاستفتاء ليه فكره معينه بجد بجد لا انا كانت اسئله مطروحه في ذهني عن الحكم هل انا بس اللي شايفاه وحش ولا بقيت الناس دي حاجه
الحاجه التانيه: عن الاخوان ان انا شوفت وقفتهم لنصره غزه فحبيت اعرف الناس شافت ولا ليسا مش بتحبهم
الحاجه التالته :النظام السياسي في الجامعات برده مبهدلين الطلاب عندنا فحبيت اعرف في كل الكليات ولا لا وديه حاجات مطروحه لي في السياسه يعني بمعني اصح اسئله انا شخصيا مش عارفه اجابتها
واخر حاجه الرابطه انا مشتركه فيها فحبيت اعرف راي الناس في عمل الرابطه
وعلي العموم جزااااااااكم الله خييييير
ورايك ده فادني بجد كتير علي كل الاسئله المطروحه في ذهني بس مش اكتر
احييكي

Unknown يقول...

السلام عليكم ورحمة الله تعالى وبركاته
1س-ما رايك في نظام التوريث؟
ج1-مش برأيي هم حينفذوه حينفذوه بس الحقيقة فى قلبى انا ارفضه.
س2-ما رايك في النظام الحاكم؟
ج2-بلاش السؤال ده لانه ممكن يجيب مشاكل:(
س3-ما رايك في رفع الاسعار لتسديد ديون الدوله؟
ج3-مرفوض طبعا لانى مش انا او غيرى السبب فى ارتفاع الاسعار النغالى فيه ده التجار هم السبب الحقيقى.
س4-4:ما رايك في قيام احزاب سياسيه تحت شعار ديني؟
ج4-بالصراحة لأ والا حتبقى مشكلة ومشكلة كبيرة كمان.
س5-مارايك في قيام الانشطه السياسيه بالجامعات؟
ج5-لو انشطة صح ممكن تبقى فعلا تدريب للحياة
السياسية للشخص (زى ايمن نور بدا من اتحاد الطلبة وكده وهو فى الكلية)
س6-ما رايك في قانون الطوارئ؟
ج6-سلاح ذو حدين :ممكن بيصون ضد المفسدين لكن برضه ممكن بيستخدم ضد الصالحين
س7-ما رايك في تزوير الانتخابات لصالح الحكومه؟
ج7-مرفوض طبعاً
س8-ما رايك في نظام جماعه الاخوان المسلمين؟
ج8-مظلومين كتير من الحكومة
س9-ما رايك في نظام رابطه مدونون من اجل فلسطين هل تحقق شيئا مفيدا؟
ج9-ارجو الله ان تفعل هذا.
س10:ما رايك في الاستفتاء؟؟؟؟؟؟؟
ج10-لاباس به.استمرى

غير معرف يقول...

جزاك الله خيرnorahaty علي رايك

غير معرف يقول...

الله يكرمك وربنا الاستفتاء زى الفل

بس انتى عارفه انى على طول بعلق على مواضيعك

بس عذرا حبيبتى هخش مره تانيه اعلق بمزاج لحسان دماغى مليانه انهرده حجات كتير

تحياتى:عاشقة الشهاده

غير معرف يقول...

جزاكم الله خير اختى عاشقة الشهاده

ولا يهمك والف سلامه عليكى

غير معرف يقول...

ان شاء الله نعلق علي المدونه وجزاكم الله خير علي الدعوه

masry يقول...

دى اول مره ادخل على مدونه حضرتك
جميله و ان شاء الله ربنا يكرمك
انا مع حضرتك فى الاسئله اللى واضعها على المدونه لكن
بالنسبه لسؤال ما رايك فى نظام جماعه الاخوان المسلمين
ازاى هاعرف اجاوب عليه مش هجاوب طبعا
لانى لو كنت اخوانى معنى ده انى هانتقد الجماعه مع مسؤلين الجماعه من الداخل و مش هانشر انتقادى
و لو مكنتش من الجماعه معنى كده انى مش عارف حجات كتير محدش يعرفها غير لما يكون داخل الجماعه
و اتمنى لحضرتك كل التوفيق

غير معرف يقول...

جزاكم الله خير مصري علي المشاركه وانا شايفه انها عادي اما تقول رايك

غير معرف يقول...

لى عودة مرة اخرى ..
ان شاء الله
الاسئلة مميزة ما شاء الله
ولى ان اجاوب على اخر سؤال


رايئ .. الموضوه هايل .. ما شاء الله

لى عوددة .. بعد تصفية ذهن ان شاء الله


اخوكم قلب ابيض

غير معرف يقول...

جزاكم الله خير قلب ابيض وننتظر عودتك لنعرف رايك في الاسئله

غير معرف يقول...

بليغ الفضلي :..........السلام عليكم ورحمة الله وبركاته

في بدايتي كلامي أسطر أعجابي بهذا الكوكب الرائع .. الذي بذل قصارى جهده ..

بالفعل قلم نحسد عليه ... اناقه وإبداع في الطرح .. مجهود وافر وملحوظ ..
هذا هو التميز الذي نبحث عنه والذي ميزة عن بقية الحضور
والذي جعله كانجم البراق في سماء مليئة في النجوم

اللهم اجعلنا من الراضين المرتضين

اللهم لك الحمد كما ينبغي لجلال وجهك وعظيم سلطانك



أحب أشكر أختي سجود على مبادرتها الطيبه

في تنزيل بعض بعض الأسئله المطروحه للأراء

والله يجزاك خير وجعلك ماتشوفين مكروه

واقول والله أنا مرتاح من الأسئله جيده

غير معرف يقول...

بليغ الفضلي جزاك الله خير
ولكن نتمني ان نعرف رايك في هذه الاسئله

رابطة هويتي اسلامية يقول...

السلام عليكم ورحمة الله وبركاته

نتشرف بدعوتك لأن تكوني عضوه معنا في رابطة هويتي إسلامية

ندعوك دعوة خاصة

ونتمني أن تزوري رابطتنا

غير معرف يقول...

ان شاء الله سازورها

وليد يقول...

1:ما رايك في نظام التوريث؟

نظام التوريث ان دل فانما يدل عت موت شعوب الدول او شعب الدولة التى يحدث فيها هذا التوريث
2:ما رايك في النظام الحاكم؟

ربنا يهديه يارب ويرجع للاسلام ولخير الناس ويبعدوا عن مصالحهم الشخصية ويعرفوا ان الخلاص لكل مشاكلنا الرجوع الى الله
3:ما رايك في رفع الاسعار لتسديد ديون الدوله؟

ديون الدولة ممكن نسددها من الحسابات الى فى سويسرا متهربة وكفاية حرام الناس مش مستحملة هيا الفتافيت للناس ويعملوا علاوة ويرفعوا الاسعار يعنى حاميها حرامية

4:ما رايك في قيام احزاب سياسيه تحت شعار ديني؟
مفيش اى مشكلة مش بنقول حرية سيبوا الناس هيا الى تحكم احنا جربنا كتير ليه خايفين من الدين نجرب ومشاكله حتبقى اقل من غيره ده لو فرضنا انه فيه مشاكل
5:مارايك في قيام الانشطه السياسيه بالجامعات؟

اويدها ويريت الحكومة تفتح المجال للطلاب يعبروا عن وجهة نظرهم وينافسوا فى الانشطة منافسة شريفة بدون فصل ولا غيره لان الشباب دوله هم حكام الغد
6:ما رايك في قانون الطوارئ؟

ربنا سيامح الى عمله وفرضه واعتقد ان يوم الغاءه عيد حقيقى
7:ما رايك في تزوير الانتخابات لصالح الحكومه؟

ربنا يهديهم ويعرفوا ان تزوير الحقيقة فى الاخرة نار لظى
8:ما رايك في نظام جماعه الاخوان المسلمين؟
ربنا يقوى رابطتهم ويبعد عنهم كل محاولة للتفريق لان اساس الدعوة المحبة والاخاء
9:ما رايك في نظام رابطه مدونون من اجل فلسطين هل تحقق شيئا مفيدا؟

ان شاء الله تحقق هيا لسه فى البداية ولازم تواجه صعاب بس الاهم انها تواصل المسيرة وربنا يرزق الرابطة باعضاء يهتموا بخدمة الدين ويعطوا وقتهم الكامل ليه
والسؤال الاخير
.
.
.
والاهم
.
.
.
10:ما رايك في الاستفتاء؟؟؟؟؟؟؟

ربنا يكرمك ويتقبل منك ويجعله فى ميزان حسناتك تفضل اسلوب للحوار المناقشة افادكى الله يا سجود

سجود يقول...

جزاكم الله خير وليد الاسلام علي المشاركه وابداء رايك بحريه

م/ الحسيني لزومي يقول...

شارك في الحملة من أجل إطلاق سراح
المدون دكتور / توكل مسعود

سجود يقول...

اللهم فرج كربه
وان شاء الله نشارك بقدر المستطاع في اي حمله تقف معه

غير معرف يقول...

شاركونا فى حملة أخلاقى أساس حياتى

يلا بينا ياشباب وساعدونا فى نشر الحملة

تعالوا زورو المدونة بتاعتنا واعرفوا التفاصيل

ولكم كل الشكر

محمد الهيتمى يقول...

مليش نفس اجاوب دلوقتى ..بجمله الاسئله الى مش عارفين نجاوبها فى البلد دى ...

سجود يقول...

ههههههه
علي العموم جزاكم الله خير
وخير بس البلد حلوه ممكن يكون العيب في اللي حاكيمنها بس او ممكن يكون فينا بقي والله اعلم

إشراقة أون لاين يقول...

سيتم بإذن الله الإجابة عن قريب
لنا عودة اختى سجود

انا العبد يقول...

السلام عليكم ورحمه الله وبركاته
السلام على من اتبع الهدى
ج1/ لا اوافق
ج2/ هنعمال إيه
ج3/ يبقى عمرها ما تتسد
ج4/ موضوع مرفوض طالما يبعث عن رغبات شخصيه فى إطار دينى
ج5/ شئ حلو لو فى إطار هادف وموجه للرقى
ج6/ حسبنا الله ونعم الوكيل
ج7/ مش فلاره كثيرفى الأخر البلد بتتنهب
ج8/ معرفش عنها الكثير فلا رأى فيهم لدى
ج9/ هشوفها بأمر الله و بعد ذلك احكم
ج10/ جميل جدا بس المهم ابيت فى بتنا هههههه

سجود يقول...

جزاكم الله خير اشراقه اون لاين ونحن في انتظارك

سجود يقول...

جزاكم الله خير انا العبد علي المشاركه

د.توكل مسعود يقول...

سجود
السلام عليكم ورحمة الله... وبعد

فلا أدرى كيف أشكركم ... ولا أستطيع ذلك... ولكنى أكل إلى الله شكركم.... ولعل عمق الأخوة.. وصدق الحب.... وإخلاص الدعاء... كانوا جميعا وراء هذه الانفراجة السريعة التى لم أتوقعها ولم تحدث معى من قبل......جزاكم الله خيرا وأحسن الله إليكم.

سجود يقول...

حمدا لله علي سلامتك
وننتظر كتاباتك التي اشتقنا اليها
وجزاكم الله خير